ກຽມພ້ອມກັນແລ້ວບໍ່ ກັບຫນັງພາກຕໍ່ຂອງພໍ່ມົດ Harry Potter ຢ່າງ Fantastic Beasts and Where to Find Them ທີ່ກຳໜົດສາຍໃນລາວໃນວັນທີ 18 ພະຈິກທີ່ຈະຮອດນີ້ ເຊິ່ງ ເຈ ເຄ ໂຣລິ່ງ ອອກມາເປີດເຜີຍວ່າອາດຈະມີຮອດ 5 ພາກກັນເລີຍ ແລະ ຂ່າວວ່າໃນພາກ 2 ນັ້ນ ເຮົາຈະໄດ້ເຫັນສາດສະດາຈານດຳເບິລດໍ ກັບມາປາກົດໂຕອີກດ້ວຍ.

ໂດຍ ເດວິດ ເຢຕສ໌ ອອກມາຢືນຢັນເປັນທີ່ຮຽບຮ້ອຍວ່າ ສາດສະດາຈານດຳເບິລດໍ ຈະກັບມາໃນ Fantastic Beasts 2 ຢ່າງແນ່ນອນ, ເຊິ່ງໜັງເລື່ອງ Fantastic Beasts and Where to Find Them ເປັນເລື່ອງລາວທີ່ເລົ່າຍ້ອນໄປກ່ອນໜ້ານີ້ປະມານ 70 ປີ ກ່ອນທີ່ຈະເກີດເລື່ອງລາວຂອງ Harry Potter, ທີ່ໃນຂະນະນັ້ນສາດສະດາຈານດຳເບິລດໍ  ຍັງບໍ່ໄດ້ເປັນອາຈານທີ່ຮອກວອຕສ໌ ແລະ ຍັງມີຂ່າວອອກມາວ່າໃນພາກນີ້ ຈະໄດ້ເຈົ້າພໍ່ໜັງແຟນຕາຊີຢ່າງ ຈອນນີ້ ເດປ ມາຮ່ວມສະແດງນຳອີກ ແຕ່ຈະເປັນໂຕລະຄອນໃດນັ້ນ ຍັງບໍ່ທັນໄດ້ມີການເປີດເຜີຍ.

ໜັງ Fantastic Beasts and Where to Find Them ພາກທຳອິດນັ້ນນຳສະແດງຫຼັກ (ພະເອກ) ໂດຍ ເອັດດີ້ ເຣດເມນ ຈະມາຮັບບົດເປັນ ນິວທ໌ ສຄາມັນເດີ ເຊິ່ງລາວເອງຫາກໍ່ຖືກສະເໜີຊື່ເຂົ້າຊິງລາງວັນອອສກ້າສາຂາ ນັກສະແດງນໍາຊາຍຈາກເລື່ອງ The Danish Girl.

ຕົວຢ່າງໜັງ.

ຂອບໃຈແຫຼ່ງຂ່າວຈາກ: devcrown