Samsung ເຂົ້າຊື້ Viv ບໍລິສັດຜູ້ທີ່ເຄີຍສ້າງ Siri ໃຫ້ Apple ຈົນປະສົບຜົນສຳເລັດມາແລ້ວ

ຕະຫຼອດຊ່ວງປີທີ່ຜ່ານມາຊື່ຂອງ Viv ລະບົບ Artificial intelligence assistant ນັ້ນເປັນທີ່ດຶງດູດຫຼາຍໃນວົງການໄອທີ. ໂດຍ Viv ກໍ່ຕັ້ງໂດຍ Dag Kittlaus, Adam Cheyer ແລະ Chris Brigham ກຸ່ມຄົນທີ່ພັດທະນາ Siri, ເຊິ່ງທຸກມື້ນີ້ Apple ໃຊ້ງານຢູ່ນັ້ນເອງ, ເຊິ່ງ Viv ໄດ້ຮັບການຍອມຮັບວ່າມີຄວາມສາມາດຫຼາຍກວ່າ Siri ນຳອີກ ແລະ ລ່າສຸດທາງ Samsung ໄດ້ເຂົ້າຊື້ກິດຈະການ Viv ແລ້ວ ແລະ ມີແຜນນຳໃຊ້ເຂົ້າກັບຜະລິດຕະພັນຂອງຕົນ. ທັງນີ້ Viv ຍັງຄົງບໍລິຫານ ແລະ ພັດທະນາໄດ້ອິດສະຫຼະ ໂດຍທີ່ Samsung ພຽງແຕ່ນຳມາໃຊ້ງານເທົ່ານັ້ນ.

ທາງ Facebook ແລະ Google ກ່ອນໜ້ານີ້ກໍ່ມີຄວາມສົນໃຈທີ່ຈະເຂົ້າຊື້ Viv ເມື່ອຕອນຕົ້ນປີ ແຕ່ບໍ່ມີການເຈລະຈາໃດໆເກີດຂຶ້ນ. Jacopo Lenzi ຮອງປະທານອາວຸໂສຂອງຊຳຊຸງໄດ້ກ່າວວ່າ: Viv ຈະເຮັດໃຫ້ການເຕີບໂຕຂອງ Samsung ແຂງແກ່ນຂຶ້ນ ແລະ ເປັນຕາໜ້າສົນໃຈ ເພາະທາງ Google ຫາກະເປີດໂຕ Pixel ທີ່ມາພ້ອມກັບລະບົບ Google Assistant AI ທີ່ໃຊ້ໄດ້ສະເພາະເທິງ Pixel ເທົ່ານັ້ນ, ເຊິ່ງການທີ່ Samsung ມີ Viv ຈະເຮັດໃຫ້ແອັນດຣອຍໂຟນຂອງຊຳຊຸງ ບໍ່ເສຍປຽບໃນດ້ານນີ້.
ທັງນີ້ Viv ຍັງບໍ່ໄດ້ມີການເປີດໂຕທາງການ ແຕ່ເຮົາສາມາດເບິ່ງວີດີໂອຄວາມສະຫຼາດຂອງ Viv ໄດ້ຈາກວີດີໂອດ້ານລຸ່ມເລີຍ. ເຊື່ອໄດ້ເລີຍວ່າເຮົາຈະໄດ້ເຫັນມັນໃນ Galaxy S8 ຫຼື Note 8 ຢ່າງແນ່ນອນ.

ຂອບໃຈແຫຼ່ງຂ່າວຈາກ: 9to5mac.com