ຂປລ. ພິທີເປີດ ສະຖານກົງສຸນໃຫຍ່ ແຫ່ງ ສປປ ລາວ ທີ່ ແຂວງຊຽງແຕງ ຣາຊະອານາຈັກ ກຳປູເຈຍ ມີຂຶ້ນໃນວັນທີ 30 ມິຖຸນາ ຜ່ານມາ ທັງນີ້ ກໍເພື່ອເປັນການ ເພີ່ມທະວີສາຍພົວພັນ ມິດຕະພາບ ແລະ ການຮ່ວມມື ລະຫວ່າງ ສອງປະເທດ ໃຫ້ນັັບມື້ນັບແໜ້ນແຟ້ນ ແລະ ເລິກເຊິ່ງ ເພື່ອເປັນການຊຸກຍູ້ສົ່ງເສີມ ແລະ ອຳນວຍຄວາມສະດວກ ໃຫ້ແກ່ການພົວພັນຮ່ວມມື ທາງດ້ານເສດຖະກິດ, ການຄ້າ, ການລົງທຶນ, ການທ່ອງທ່ຽວ ຂອງສອງປະເທດ ໃຫ້ນັບມື້ນັບ ຂະຫຍາຍຕົວ ແລະ ທັງເປັນປະກອບສ່ວນ ເຂົ້າໃນການສ້າງ ເປັນປະຊາຄົມອາຊຽນ, ໂດຍສະເພາະ ແມ່ນປະຊາຄົມ ເສດຖະກິດອາຊຽນ.
ພ້ອມນີ້, ຍັງເປັນການສ້າງ ຄວາມສະດວກສະບາຍ ໃຫ້ປະຊາຊົນລາວ ແລະ ກຳປູເຈຍ ໂດຍສະ ເພາະ ປະຊາຊົນທີ່ຢູ່ລຽບ ຕາມຊາຍແດນ ໄປມາຫາສູ່ກັນ. ເນື່ອງຈາກວ່າ ໃນປັດຈຸບັນ, ປະລິມານການຄ້າສອງຝ່າຍ ແລະ ການໄປມາຫາສູ່ກັນ ຂອງນັກທ່ອງທ່ຽວ ກໍຄື ປະຊາຊົນສອງຊາດ ທີ່ຢູ່ເຂດຊາຍແດນ ລາວ-ກຳປູເຈຍ ນັບມື້ມີຈຳນວນເພີ່ມຂຶ້ນ. ສະເພາະປີ 2015 ຜ່ານມາ, ມູນຄ່າການຄ້າ ສອງຝ່າຍ ສາມາດບັນລຸ ໄດ້ 24 ລ້ານກວ່າ ໂດລາສະຫະລັດ ແລະ ຈຳນວນຄົນ ທີ່ໄປທ່ອງທ່ຽວ ແລະ ຄ້າ-ຂາຍ ກໍເພີ່ມຂຶ້ນເປັນ 416.000 ເທື່ອຄົນ. ດ້ວຍເຫດນັ້ນ, ລັດຖະບານ ສອງປະເທດ ຈຶ່ງເຫັນດີຮ່ວມກັນ ໃຫ້ເປີດສະຖານ ກົງສູນໃຫຍ່ຂອງ ສປປ ລາວ ແຫ່ງທຳອິດຂຶ້ນ ທີ່ແຂວງຊຽງແຕງ ຣາຊະອານາຈັກ ກຳປູເຈຍ ແລະ ເປັນກິດຈະກຳໜຶ່ງ ທີ່ສຳຄັນ ທ່າມກາງບັນຍາກາດ ທີ່ສອງປະເທດ ກຳລັງສະເຫລີມ ສະຫລອງ ວັນສ້າງຕັ້ງ ສາຍພົວພັນການທູດ ລະຫວ່າງ ລາວ-ກຳປູເຈຍ ຄົບຮອບ 60 ປີ (15/6/1956-15/6/2016).
ເຂົ້າຮ່ວມເປີດ ກົງສູນໃຫຍ່ໃນຄັ້ງນີ້, ມີທ່ານ ແສງເພັດ ຮຸ່ງບຸນຍວງ ຮອງລັດຖະມົນຕີ ກະຊວງການຕ່າງປະເທດ ແຫ່ງ ສປປ ລາວ ແລະ ທ່ານ ລອງ ວິຊາໂລ ຮອງລັດຖະມົນຕີ ກະຊວງການຕ່າງປະເທດ ແລະ ການຮ່ວມມື ແຫ່ງ ຣາຊະອານາຈັກ ກຳປູເຈຍ, ມີເຈົ້າແຂວງ ຈາກບັນດາແຂວງ ໃກ້ຄຽງຂອງລາວ ແລະ ກຳປູເຈຍ, ເອກອັກຄະລັດຖະທູດ ລາວ ແລະ ກຳປູເຈຍ, ພ້ອມພາກສ່ວນກ່ຽວຂ້ອງເຂົ້າຮ່ວມ.
ທີ່ມາ ຂປລ
ไม่มีความคิดเห็น:
แสดงความคิดเห็น